ХОВД ИХ СУРГУУЛИЙН

БАЯН-ӨЛГИЙ АЙМАГ ДАХЬ

САЛБАР СУРГУУЛЬ

Menu

Захирлын мэндчилгээ

Баруун бүсийн эрдэм оюуны их өргөө Ховд их сургуулийн Баян-Өлгий аймаг дахь салбар сургуулийн нийт профессор, багш ажилчид, оюутан суралцагч, үе үеийн удирдлагууд, төгсөгчид, салбар сургуулийг өнөөдрийн өндөрлөгт хүргэхэд тусалж хамтран ажиллаж ирсэн хамтран зүтгэгчид, төрийн болон төрийн бус байгууллагууд, ард иргэдэд  хамт олны нэрийн өмнөөс талархлаа илэрхийлье! 

Ховд их сургуулийн Баян-Өлгий аймаг дахь салбар сургууль нь анх БНМАУ-ын Сайд нарын зөвлөлийн 1990 оны 2 дугаар сарын 10-ны өдрийн 48-р тогтоолоор “Багш, соёлын ажилтан бэлтгэх тусгай мэргэжлийн дунд сургууль” нэртэй байгууллагдаж, бага ангийн багш, дуу хөгжмийн багш, цэцэрлэгийн хүмүүжүүлэгч багш бэлтгэх тусгай зөвшөөрлөөр 11 багш, 83 оюутан, 12 ажилчинтай үйл ажиллагаагаа эхэлж байсан бол 1996 оны 11 дүгээр сарын 23-ны өдрийн Монгол Улсын Гэгээрлийн яамны 120 тоот тушаалаар УДБС-ийн харьяа Баян-Өлгий аймаг дахь Багшийн Коллеж болж  статус нь өөрчлөгдөж, суралцагчдад дипломын дээд боловсрол олгож ирсэн билээ.

Тус сургууль нь 2010-2011 оны хичээлийн жилээс Монгол Улсын засгийн газрын 2010 оны 1 дүгээр сарын 20-ны өдрийн 15 дугаар тогтоолоор Ховд Их Сургуулийн Баян-Өлгий аймаг дахь салбар сургууль болж өөрчлөн байгуулагдаж Их сургуулийн хэмжээнд хүрсэн 27 жилийн түүхтэй Баян-Өлгий аймаг дахь төрийн өмчийн ууган сургууль юм.   

Өнгөрсөн хугацаанд Ховд их сургуулийн шинэчилж боловсруулсан хөгжлийн бодлого, стратеги төлөвлөгөөг хэрэгжүүлж, ирээдүйд нийгмийн хэрэгцээ шаардлагыг хангасан олон улсын түвшинд ажиллах чадвартай мэргэжилтэн бэлтгэхийн төлөө хичээл зүтгэл гарган ажиллаж, үндэсний болон баруун бүс нутгийн хөгжлийн хэрэгцээг хангах, чадварлаг,   төлөвшсөн багш судлаачдыг бэлтгэж төгсгөсөн ба тус сургуулийн үе үеийн төгсөгчид Монгол улсын өнцөг булан бүрт, ялангуяа баруун 5 аймагт, ОХУ, Казахстан улсад мэргэжлээрээ болон нийгмийн бусад салбарт амжилттай ажиллаж, амьдарч байна.

Манай сургууль Та бүхэнд үргэлж нээлттэй байх болно. Та бүхэнд аз жаргал, эрүүл энх, ажил хөдөлмөрийн өндөр амжилт хүсэн ерөөж, чин сэтгэлийн мэндчилгээ дэвшүүлье!

ХИС-ийн Баян-Өлгий аймаг дахь салбар сургуулийн захирал    С.Гаура (Ph.D)